Нұр-Сұлтан қаласы әкімдігінің Мемлекеттік академиялық филармониясы
Ұжымдар
БЕРІК БАТЫРХАН

Берік Батырхан – Нұр-Сұлтан қаласы әкімдігінің Мемлекеттік академиялық филармониясының сифониялық оркестрінің көркемдік жетекшісі

Берік Батырхан (1990 жылы дүниеге келген) жас, дарынды қазақстандық дирижерлардың бірі. 2015 жылы «Опера-симфониялық дирижерлық ету» мамандығы бойынша Құрманғазы атындағы Қазақ Ұлттық Консерваториясын аяқтады (доцент Н.С. Жарасовтың сыныбы). 2017 жылы Гнесиндер атындағы Ресей музыка академиясында магистр дәрежесін алды. (РФ еңбек сіңірген қайраткері профессор В.П. Зиваның сыныбы).

Студенттік жылдары Құрманғазы атындағы Қазақ Ұлттық Консерваториясының симфониялық оркестрінің дирижеры болды және Оңтүстік Корея қалалары бойынша гастрольдік сапар аясында Давид Герингас, Анатолий Левин, сондай-ақ Дориан Уилсон сынды дирижерлардың көмекшісі болды. В. Папян, М. Болдери, Т. Курентзис, Л. Шамбадалдың және Ю. Симоновтың шеберлік сыныптарына қатысты (2013 және 2017 жылдары).

2015 жылдан бастап Астана қаласы әкімдігінің Мемлекеттік академиялық филармониясының симфониялық оркестрінің көркемдік жетекшісі болып табылады. Қазақстандық композиторлардың үздік симфониялық шығармаларын насихаттаумен белсенді жұмыс жасайды. Берік Батырханұлының жетекшілігімен Қ. Мусиннің №1 симфониясы, Ғ. Жұбанованың «Сарыөзек метафоралары» №3 симфониясы, С. Танеевтің «Иоанн Дамаскин» кантатасы, Т. Қажығалиевтің, Т. Мыңбаева, С. Әбдінұровтың, С. Еркімбековтың және т.б. композиторлардың туындылары Астана қаласында алғаш рет орындалды.

Берік Батырханұлының жетекшілігіндегі елордалық филармонияның симфониялық оркестрімен бірге КСРО халық әртісі Б.Төлегенова, КСРО халық әртісі Лиана Исакадзе, ҚР еңбек сіңірген әртісі Нұржамал Үсенбаева және т.б. көптеген танымал орындаушылар өнер көрсетті.

Қазақстан Республикасы Мәдениет және спорт министрлігінің Құрмет грамотасымен марапатталды.

«Опера-симфониялық дирижерлық ету» аталымы бойынша «Шабыт» халықаралық байқауының лауреаты (Астана, 2015 жыл).

Н.Тілендиев атындағы Республикалық байқаудың Гран-при иегері (Астана, 2015 жыл).